पुणे येथे रविवार १९ नोव्हेंबर रोजी होणाऱ्या अखिल भारतीय महिला गझल संमेलनाच्या स्वागताध्यक्षपदी डॉ. स्नेहल कुलकर्णी

गारगोटी प्रतिनिधी
महाराष्ट्रातील अग्रगण्य संस्था गझल मंथन साहित्य संस्थेच्या वतीने सावरकर अध्यासन केंद्र डेक्कन, पुणे येथे रविवार दि.१९ नोव्हेंबर २०२३ रोजी होणाऱ्या अखिल भारतीय महिला गझल संमेलनाच्या स्वागताध्यक्षा म्हणून म्हणून डॉ. स्नेहल विनय कुलकर्णी ( गारगोटी) यांची निवड करण्यात आली आहे.
गझल क्षेत्रात प्रथमच महिला गझलकारांचे अखिल भारतीय महिला गझल संमेलन आयोजित केले असून या गझल संमेलनाला महाराष्ट्रासह देशभरातून महिला गझलकार उपस्थित राहणार आहेत.
या संमेलनाला अध्यक्षा म्हणून जेष्ठ गझलकारा शोभा तेलंग तर स्वागताध्यक्षा म्हणून डॉ. स्नेहल विनय कुलकर्णी ( गारगोटी) उपस्थित राहणार आहेत. संमेलनाचे उद्घाटन जेष्ठ गझलकारा संगीता जोशी यांच्या हस्ते होणार आहे. तर प्रमुख अतिथी म्हणून आ. उर्मिला बांदिवडेकर, डॉ. संदीप गुप्ते, किरण केंद्रे, प्रमोद खराडे आणि संस्थेचे सचिव जयवंत वानखेडे उपस्थित राहणार आहेत.
यावेळी ‘गझलअमृत’ या दिवाळी अंकाचे तसेच ‘गझलयात्री’ या महिला विशेष गझलसंग्रहाचे प्रकाशन होणार आहे. नामवंत महिला गझलकारांचे मुशायरे यावेळी आयोजित करण्यात आले आहेत.
गझल रसिकांनी या संमेलनाचा आस्वाद घ्यावा असे आवाहन गझल मंथन साहित्य संस्थेचे अध्यक्ष आ. अनिल कांबळे, उपाध्यक्ष देवकुमार गुमटकर, सचिव जयवंत वानखेडे, सहसचिव उमा पाटील, प्रसिद्धीविभाग प्रमुख भरत माळी व पुणे जिल्हा कार्यकारिणीच्या पदाधिकाऱ्यांनी केले आहे.